Tobias Meissner 1966 – 2016
Kelkaj en Berlin eble konis Tobias Meissner (Stenografo), kiu estis regula partoprenanto de la ĵaŭda rondo en Falkstrasse 25 (Neukölln). Alexander Galkin nun informis pri lia forpaso per retmesaĝo. Memor-paĝo por li estis kreita sur Facebook, bonvolu kontribui tie, se vi volas lasi mesaghon. Adreso
Laŭ Vikipedio:
- naskita la 12-an de junio 1966 en Friedrichroda; mortinta la 6-an de decembro 2016 en Blankenfelde-Mahlow
La 6-an de decembro 2016 en aĝo de 50 jaroj mortis berlina esperantisto Tobias MEISSNER. Bedaŭrinde ni scias nenion pri la morto-kialo kaj eĉ la morto-dato estis nur antaŭ nelonge konfirmita.
Ŝajne estis neniuj parencoj, kiuj povis okupiĝi pri li kaj liaj postlasaĵoj; do, li estis entombigita sur la ŝtata tombejo en Mahlow apud Berlino.
Multaj konis Tobiaso-n kiel multjaran fervoran partoprenanton de la fama berlina rekontiĝo “Ĵauda Rondo” (siatempe etabligita de Hermann TAUTORAT en Espoteko en berlina kvartalo Neukölln).
Tobias atendis ĉiun renkontiĝon dum pluraj jaroj kaj ĉiam estis tre valora kontribuanto al la ronda diskuto. Li karakteriziĝis per sia treege vort-riĉa kaj metafor-plena lingvo. Li pliriĉigis Esperanton per multaj tre taŭgaj esprimoj (ekz. „peton” kiel respondo al „dankon”, „se mi ĝuste eraras” ktp) kaj tradukis plurajn porinfanajn kantojn (ekz. „Hoppe, hoppe, Reiter”).
Li estis tre kompetenta pri preskŭ chiu burokrata afero (ne nur en negativa senco) kaj volonte konsildonis en kazo de demandoj au iuj problemoj. Li estis multjara abonanto de la revuo test de “Fonduso Varoj-testo” (Stiftung Warentest) kaj ĉiam kunportis kopiojn de intereresaj kaj gravaj artikoloj el ĝi.
Tobias ĉiam diligente notis gravajn okazaĵojn en la vivo de siaj amikoj kaj poste dum jaroj akurate gratulis, ofte per lerte mem-faritaj poŝtkartetoj (en la formo de bildoj kun amuzaj Esperanto-tekstoj!). Multaj rememoris pri tiuj eventoj nur dank al tiuj eta gratuloj.
Krom Esperanto Tobias serioze okupiĝis pri stenografio (li mem nomis sin „Tobias, la stenografo” kaj estis dum certa tempo sekretario de berlina stenografia asocio) kaj interesiĝis pri scienc-fikcio (ankau tie li estis membro de asocio kaj tre alte taksis la orient-germanajn tradukojn de rusaj kaj usonaj verkoj). Li korespondis kun multaj famaj homoj, ekzemple kun Stalislaw LEM, fama pola scienc-fikcia verkisto.
La chiutaga vivo de Tobias ne estis simpla. Pro sia vid-handikapo li ne sukcesis finstudi la juran fakon (kion li volis en lernejo), kaj malgrau liaj enormaj scioj pri juro estis tre malfacile por li trovi taŭgan laboron. Unufoje li sukcesis akiri la postenon de jur-helpanto en Promigra – la asocio, kiu helpis al nov-alvenintaj migrantoj integriĝi en la germanan socion –sed post duonjaro tiu posteno estis nuligita kaj li plu laboris tie senpage! Pro tio li daŭre havis juĝajn batalojn kontraŭ „labor-administracio” (Arbeitsamt), kiuj multe afliktis lin. Li multfoje diris, ke li ŝatus relokiĝi en malgrandan vilaĝon en Siberio, sen civilizacio, sen ajnaj rilatoj kaj vivi tie trankvile for de la urba bruo kaj zorgoj.
Tobias estis tre hela homo, kiu ĉiam donis sin la tuta por siaj amikoj. Li restas tia en nia memoro.
Memor-pagho por li estis kreita sur Facebook, bonvolu kontribui tie, se vi volas lasi mesaghon:
https://www.facebook.com/Memorpa%C4%9Do-pri-Tobias-Mei%C3%9Fner-1930854487239347
[custom-facebook-feed id=Memorpaĝo-pri-Tobias-Meißner-1930854487239347 num=10]
1 Response to Tobias Meissner (1966 – 2016)